Cerpen Iban

Jaku Pengalalu

Cerita dalam cerpen tu semina dikelulu serta ditempa aja.Semua karekator,pengawa,pendiau,nama mensia enggau menua nadai besangkut-paut enggau orang ti agi idup tauka udah mati.Selamat macha ngagai kita semua.

Tampung....(Bagi ke- 2)

NUAN

Tumu pagi tadi,hari serumba kerebak tawas mata Erik lalu enggai agi  tinduk.Puas iya mejamka mata iya ngichaka deka lelap,tang lalu enggai tinduk agi.Meda bakanya iya nguji nyingitka tubuh diri ke kiba.Dipejamka iya mata enggai ga ngantuk.Iya lalu bekalih baru nguji nyingitka tubuh diri ke kanan.Pejamka iya mata sama ga agi asai nya.Lalu enggai ngantuk mata iya.Anangka ka ngantuk,nyau nambahka dedenggar leka mata iya.Meda baka nya,iya  lalu ngangkatka tubuh diri ari gali.Erik lalu duduk.Iya lalu ngaliat.Udah nya Iya lalu ngelisika baju ti dikena iya tinduk malam tadi ari tubuh iya.Erik meda jam ba talipon binching.Baru pukul 5.40 pagi.Enda mukai-mukai runding Erik ingatka  gari ti agi mengkang direndam iya dalam baldi lemai mari.Kasam semalam.

“Manah aku bebasu dulu,”ku Erik bejaku Kediri dalam ati iya

Meda baka nya,Iya lalu nyapai kain mandi ti dilempai ba tali pengaredai  tisi dinding.Lalu dibelitka iya kain mandi nya ba punggung.Udah nya,tudah tuai lalu nyapai baju ti baru dikelisi ka iya ari tubuh iya tadi.Erik nurun begadai-gadai ari atas katil nya.Iya lalu ngulurka kaki iya berindik ba gigi tangga  penurun enggau nanka penyimat  iya.Nadai didingga serap kaki.Enda nyalah baka pejalai urang ka ngayap maia malam ari.Erik enggai ngacau bala bakih iya ti agi tinduk.Maya nya,bala bakih iya agi belungun enggau puak magang.Bebungkur apus.Bisi nya meluku singit.Bisi nya tinduk gegejur .Macam-macam ulah peninduk sida sebilik  dipeda Erik.Erik lalu nyingkangka kaki iya nuju bilik mandi.Sebedau tamak,iya lalu ngidupka suis lampu ba tisi dinding awakka dalam bilik mandi terang dipancar api.Udah nya iya lalu nutup pintu.Erik lalu nepuk baju ke dalam beledi ti berisi gari ti udah direndam iya kenyau lemai mari.Diindik serta digirauka iya kaki  ke dalam beledi nya awakka serampur kena ummo.Nama dah,udah nya iya lalu berengkah betesahka gari nya.Nyau kerus-kerus tudah tuai beberuska gari .Nadai tentu beleman iga gaia tudah tuai nuci gari.Digusuk-gusuk aja udah cukup.Kena muai bau peluh aja.Janji udah dibasu,iya meh nya.Agi pin gari nya ,gari kena gawa.Ukai gari lawa tauka gari kena ke pasar.Nama ka dipelemanka nya.Enda lama udah nya,Erik udah abis betesahka gari.Iya lalu musinka pala ai paip.Ai pansut ari rumbang paip nya deras amat.Nyau bekesuling munyi ai nya.Erik lalu nambun ai ngena beledi.Apin datai seminit ai nya udah penuh ba dalam baldi.Pala pemansut ai nya lalu dipusinka iya pulai baru awakka ai enda pansut agi.Semua gari ti dibasu iya tadi ditepuka iya baru ke dalam beledi  ti berisi ai nya.Udah nya,iya lalu nyingkau gari ari dalam baldi nya siti-siti lalu dipulaska iya sampaika nadai balat agi ai beteritik.Abis gari dalam beledi dipulaska iya,Erik lalu nyiuhka  ai ti begulai enggau ai pupu sabun dalam beledi nya.Udah nya,Erik ngengkahka gari nya ba dalam beledi nya baru.Beledi nya dijuka  iya ngena kaki ke tisi sukut pintu awakka enda kena tanjah ai sabun enti maia iya besabun.Erik lalu berengkah nanjah tubuh diri.Erik lalu musinka pemuka ai paip ti nyumping atas  paip getah  tisi dinding.Peda nyau engkeching pancur ai pansut nata atas pala iya.Baka pengalabuh leka ujan ari langit.Berasai geresi tubuh terubah kena pecik ai pagi nya.Udah tubuh apus basah,iya lalu nyeput batang pemerus ngeli enggau ubat ngeli ba serangan sabun.Erik lalu merus ngeli diri.Kemas merus ngeli,nya baru iya besabunka tubuh diri.Apin lama betanjah enggau ai,enda mukai-mukai  pintu bilik mandi munyika bisi dipangkung urang ari luar.

Tok! tok !tok ! bunyi pintu dipangkung.

“Unggal…..unggal, agi lama nuan mandi,? “pia ku jaku ari luar

Erik lalu ngelala patah nyawa urang ka mangkung pintu bilik mandi nya.Bakih iya Kaling nya.

“Enda….unggal.Ka pansut meh aku tu, ”timbal Erik ari dalam bilik mandi.“Nama emergency call pia?“tanya Erik baru seraya ka nundi Kaling

“Nya meh,nyau muat perut aku tu unggal, ”

Erik lalu beguai-guai musinka penutup pala paip.Jari iya lalu nyapai kain mandi ti dikaitka iya ba belakang pintu bilik mandi.Iya lalu ngendas tubuh diri.Udah nya,iya lalu melitka kain mandi nya ba punggung.Tembu nya iya lalu ngansatka penekal pintu bilik mandi.Pintu pin lalu teteukang.Ba mua pintu,Kaling endang udah nganti enggau mua ngirut sambil jari sepiak iya mechal perut.Enda bebaju.Semina bekenaka kain mandi  aja ba tubuh iya.Sebedau Erik pansut ari bilik mandi nya,iya lalu nyapai rambing beledi  ti berisi gari ti udah tembu dibasu iya tadi.

“Bah,mansa nuan dulu unggal,”pia ku pinta Erik

Ninga munyi nya,Kaling lalu nyingitka tubuh diri awakka Erik ulih betelish tubuh enggau iya laban ruang ba endur bilik mandi dia sekut.Ngelebus ari nya,Kaling lalu beguai-guai  tamak ke dalam bilik mandi.Muti ka udah ditikup pintu jamban,dinga beteratat utai bebunyi.

Prittttttt…….!!pritttt……!!!pia ku munyi utai dalam bilik mandi.

“Balat utai pagi tu,”ku kaban Erik ti bejaku mut-mut ari sepiak katil.Shiney nama iya.Iya udah dani tang agi gali ba peninduk iya.Agi belamun enggau puak.Semina pala iya aja diayanka iya lebuhka bejaku.

“Uji suiska api kitai nya unggal,kalaka nuan udah bediri tisi dia,” ku Richard bejaku ari atas katil iya ka gali.

Ninga jaku Richard munyi nya,Erik lalu ngetu.Iya  ngengkahka beledi  ba atas tikai.Erik lalu ngidupka suis api.Udah nya iya lalu ngerebakka mua pintu penamak.Iya lalu nyapai beledi nya baru,lalu pansut.Iya lalu napatka palan pengeredai gari ba tisi puting bilik sida iya.Iya lalu ngeredai semua gari ti dituci iya tadi.Udah nya tembu,iya ngengkahka beledi gari tadi ba tisi pintu sida sebilik.Udah nya,Erik tamak ke dalam bilik sida iya baru.Maya nya,Kaling udah mulaika diri ari bilik mandi.Iya udah nududukka diri  ba tisi katil iya empu.Iya benung ringo ngelumai ai irup ngena changkir besai.Radio Iban udah memunyi dipasang Kaling.Radio nya benung naburka berita pagi.

“Lalu mandi nuan pia ?Pama jamah nuan pagi tu neh unggal.Laju endar.Enda datai sepuluh minit,”ku Erik bejaku nanya Kaling sepengudah iya tamak ke dalam bilik.

“Akaidaiiiii……! nyamai amat.Asaika pansut ari nyawa baya.Nya meh mandi style sida P.Ramlee,”ku Kaling bejaku

“Sigi baka iya meh nya unggal.Raja nya unggal,enti maia iya minta dianjung,enda tau enda dianjung.Baik nya maia ujan,kudi,tauka malam hari mesti meh dianjung meh unggal.Enti iya udah minta.Nya iya dikumbai kitai raja mensia.Enda ulih laban kitai jaku iya.Mesti diturutka kitai,”ku Erik

“ Amat unggal.Betul endar utai ku nuan nya ,“ku Richard nyelepakka jaku iya.”Aku ka meh nganjung antu tu.Abis jaku iya,dia tudah Richard lalu tamak ke dalam bilik mandi.

  Erik lalu mansang nuju tangga peniki katil iya empu.Erik ka begari.Datai di atas katil,Erik nekanka remote controll tv.Progrim Selamat Pagi Malaysia benung dikeluarka ba tv1.Meda baka nya ,Erik lalu ngalihka stesin tv nya ke stesin tv2.Peda cerita katun benung diayanka dia.Iya lalu ngalihka stesin nya  ngagai stesin tv ntv7.Progrim belagu Music On 7 benung ditaburka ba tv nya.Iya  rindu ninga lagu ti diayan ba progrim nya.Diberi iya besai agi munyi nyawa lagu ba tv nya.Udah nya Erik lalu ngalika diri.

 

***********************

Pagi nya,Erik sama nyeretai  bakih iya,ianya Kaling seduai Shiney nurun ke tamu.Tamu nya  digaga ba luar ari kandang kilang Manuplywood.Bisi langkau bala penyaga   gate digaga betapak enggau litan tamu nya.Enda tentu tumu igak sida tiga nurun ari hostel pagi nya.Enti enda saru Erik,urung pukul 9.30 pagi.Seninjik amat,lebuh sida sebuat  datai ba jalai besai ,enda mukai-mukai  Erik enggau dua iku bakih iya bisi terpeda ka indu bejalai tanjun-tanjun ari ujung jalai nuju semak sida  sebuat.Indu tiga iku nya baru pansut ari  hostel ungkup sida ka dara.Seraka blok hostel indu enggau blok sida Erik mina beberapa puluh meter aja.Bisi siti  hostel sida indu mina diraga enggau pagar dawai dikena nyapat adan antara blok lelaki enggau indu.Hostel ungkup urang ti udah berumah tangga jauh agi.Ba tingkah penurun tangga nuju dining hall  ianya ari baruh kantin kilang Manuply nya empu.Kira-kira dua ratus meter takah ari blok hostel A15.Mimit da agi sida tiga laun pansut ari hostel  nadai meh sida bersatup enggau tiga iku indu nya.

“Indu…indu,”ku kaling bejaku enda tentu inggar madah ngagai Erik enggau Shiney sambil iya ngamunchungka mulut diri dikena madahka tunga indu ti datai ari mua kanan jalai ujung din.

Nama disebut pasal indu sigi idup isi bala kaban.Ukai anak lelaki ga nama ia,enti meda indu nyau lari.Kemaia mayau kala lari ka cit.Empai kala ninga manuk lari meda padi.Ikan lari meda umpan.Anang ka urang bujang,apai urang enti meda indu tajam meh mata iya.Lurus-lurus baul ginti,benchuk meh ujung ia.Nundi aja pama meh.Au…Ichak enda ngempu.Bayam aja pama meh,pia ku jaku sekeda urang.

“Anti ulih kitai.Selin enggau kaban iya nyin,”pia ku Shiney sambil iya ngenyitka kulit kening nuju Kaling enggau Erik.Kaling enggau Erik enda mantah jaku Shiney.Seduai iya sama senyum tanda setuju.

“Benasib amat kitai tiga pagi tu unggal,manah mimpi”Ku Kaling bejaku bungah

Erik majak senyum ninga jaku Kaling munyi nya.Meda bakanya,sida Erik sekaban lalu ngarindang diri.Singkang kaki lalu diketuka sida tiga.Sida tiga berdiri tisi jalai sambil ka bayam pemanah rampa menua maia pagi hari nya.Erik sengaja  nyandihka tubuh diri ba tiang jalai serayaka nganti indu tiga iku nya mansa.Urang bukai bisi mega bepansa enggau  sida tiga ti benung bediri ba endur nya.Bansa Indon.Bisi indu lalu bisi mega lelaki.Sekeda bisi mega bejalai begulai enggau tawing diri empu.Bisi nya bepegai jari enggau ambai diri.Sida nya sama ka nurun ke baruh kin magang dipelabaka Erik.Lama-kelama nyau semak kesemak ga indu dipeda.Nyau lingut-lingut pejalai sida.Sigi baka ia meh nya,endang gaia pejalai urang indu.

Kada enda ka nurun ke pasar Bintulu kini,peragam ati Erik Kediri lebuh ke nganti penatai indu tiga iku nya.Lawa amat ngepan dikena indu tiga iku nya dipeda iya.Dua iku indu nya ngena tanchut jean panjai berchura biru.Lalu siku agi,ngena kain skirt berchura mansau terang tuntung pala patung.Dua iku indu nya ngena baju T chelum.Lalu siku agi ngena baju panjai lengan berchurak kelabu.Sida tiga sama bekenaka sandal. Sida tiga nya dikelala Erik nama.Dua iku ari indu nya endang teleba Erik.Seduai iya selalu ngarandau Erik lebuh gawa dalam kilang.Erik mega nemu seduai iya udah bisi ambi ati.Semina siku indu ari sida tiga nya enda kala berandau  enggau Erik.Erik mina nemu nama iya Fatin.Nya aja.Nya  pin Erik nemu lebuh ninga urang tauka bakih iya ngangauka nama nya.Enti enda silap,Erik bisi ninga urang madah Fatin nya betunggal Mira.Betunggal ya ka berapa kali,enda ga Erik nemu endar.Indu tiga iku nya bela bejalai  seretai.

”Kini wai ?Lawa amai kita pagi tu.Ulih kami tiga bejalai sertai enggau kita tiga?“ku Kaling ngepunka jaku lebuh sida tiga nuntung ba sida Erik sekaban ti nganti ari tadi.Pun jaku dikena  masang amba randau enggau sida tiga.

“Nadai nya salah.Ukai nya dimak kami tiga kita dah.Sama ngayun ka kaki diri kitai tu.Kami  ka ke baruh kin.Meli barang, “pia munyi saut siku indu sambil iya meri senyum.Nama indu nya Selin.Dua iku kaban iya ti bukai enda memunyi.Semina naburka buah senyum aja.Manis amat senyum urang indu dipeda Erik.Enda ulih ditiu enggau leka jaku.Ngasuh lintan ati rawan enda menuku.Seleka jaku nadai meh pansut ari mulut seduai iya.Ah dah !...ngumba amai  enggai bejaku pia ku mut Erik dalam ati diri.

“Au pia,”ku Erik serta meri tuchum nuju sida tiga.Tuchum dikena nginti ati sida tiga.

“Kita dah.Kak kini?“tanya urang indu.Sekali tu,gilir indu bernama Mira bejaku.

“Nya meh,sama baka kita tiga kami tu.Deka meda utai ke baruh kia”ku timbal jaku Shiney ari tisi.

“Ngiga utai ka nadai diri.Ngichaka bisi insur”saut Kaling  lalu diserta enggau ketawa.Selin enggau Mira  beperening gamal pangan diri.Tuchum-tuchum cit seduai iya.Nyangka geli ati seduai iya ninga jaku Kaling.Sambil ka berandau  sida Erik enggau indu tiga iku nya semampai nyinkangka kaki.Pia bejaku,pia bejalai  sida enam nurun jalai bebukit ke baruh.Indu tiga iku nya bejalai dulu.Kaling,Shiney serta Erik entudi ari belakang.Ari belakang,siut bau minyak wangi ti dikena sida indu tiga iku nya cukup manah amat.Mansik bau rengut tamak lubang idung.

”Kami tiga tu bedau bisi kaban ambika pangan,bedau bisi sulu enggau bemadu”pia ku jaku serdah pansut ari mulut Kaling.Jari kanan iya lalu ditawiska iya ba belakang Erik.

Erik mina nagunka pala tanda nyukung utai ku Kaling amaipin Erik nemu Kaling bebula jaku ba mua indu  tiga iku nya.Enggai nyadi enda supporting ba hal ngidup ka kaban.Mati daun ga tudah kaban eti enda digaga pia.

“Pama apai urang tu bejaku.Nemu amat ngalicha neh .Enda pia Mel, ?”ku Selin

”Amat nya.Linut enggau mulung enti dipegulai sigi nyadi iya.Kumbai nuan enda ngalala bini nuan kami tu,?”pia ku jaku Selina

“Apuuu…..!Aku tu agi bujang dikumbai kita udah bisi bini,”pia ku saut Kaling

“Peda nuan Lin,majak iya ka ngalentong kitai.Kitai ga udah apai urang,apai urang meh wai-wai.Anang ka ngiga lebih,”kenu ku Mira

”Amai ga laki Selina tu.Kumbai nuan enda nemu  kami tu,”Mira ninggika nyawa iya sambil bejaku baru.” Selina  sama enggau nuan gawa ba kantin  atas dia,enda pia ia Tin,?”tanya Mira sambil iya nukuka jaku iya enggau kaban iya ka siku agi ianya Fatin.

“Betul, ”ku indu nya ngamatka jaku kaban iya.Semina seleka aja jaku iya pansut.

“Opss !Enda ulih pai agi daun  tu neh….enti baka  nya,“ku Kaling lalu rerising deka ketawa.

Baru sekali nya Erik ninga Fatin mansutka leka jaku sekumbang bejalai ari tadi.Tu nyau nuntung ba mua gate.Udah tisi pintu pemansut ari compound kilang amat-amat,baru iya didinga bejaku.Lekat amat indu tu dibai berandau,pia ku runding Erik.Enda baka  bakih iya dua iku nya.Ah….biasalah nya.Tunjuk imun.Jual mahal konon !munyi ku jaku laut.Pia ku Erik nguji ngayamaika ati diri.Erik nyeling belai ngagai Fatin.Ari atas pala dataika ujung kaki  abis diperatika Erik.Dipeda Erik bisi gelang getah berbungai chura chelum dirasukka ba sepiak lengan kanan Fatin.Gaya utai nya enda nyalah baka pengikat buk.Manding amat utai nya dikena Fatin laban iya burak.Tunjuk jari manis sepiak kiba bisi dirasuk enggau tinchin emas.Kada enda bisi urang ngempu kini,pia kenu ku ati Erik.Anang-anang udah betunang.Baka tapang udah bisi rengunyan diau nepan.Baka idang udah bisi urang nansang.Rindu amat Erik bayam gamal Fatin tajapin Fatin enda nemu diri diperatika Erik.Enti Fatin nemu tentu iya malu.

“Nadai nurun ke pasar Bintulu Kita tiga ?”ku Kaling nanya baru.Sida tiga mina ngilikka pala aja.

“Bisi ke pasar kita malam tu meda urang rami ba funfair ?”tanya Selin

“Bisi.Nama ka enggau kami ?”pia ku jaku Shiney

“Lapa enggai…..enti ka mai kami tiga,”ku Mira

“Nadai nya salah dah,”ku Shiney

“Amat nuan ?Ni Salam bisi enggau kita legi ?“tanya Mira

“Engka enggau iya dipelaba ka aku.Anang irau nuan,legi meh aku mai apai tuai nuan nya dah,”Ku Kaling nundi Mira.Berupai bebali merah mua Mira sepengudah  Kaling nyebut nama Salam nya apai tuai iya.

“Nemu kami kita ka pangan Salam dah.Enda ibuh belalai wai.Udah nemu kami dah.Buah rian,ka bakani  ngelalaika iya ditemu urang meh iya.Enda pia iya unggal”ku Kaling majak nundi Mira.Mira lalu ngayunka kaki iya ba Kaling nguji ka  nandin kaki Kaling.Tang salah.Kaling sempat nyilat.

“Kasar amat iya tu.Kati enti kena tadi,kumbai nuan enda pedis.Uji aku ga matis nuan,”Kaling majak nundi Mira

“Ba anang nundi urang enti enggai pedis,”Mira nimbal jaku Kaling enggai alah

“Ya bula nya dah,Salam nya apai tuai nuan,”sambung Kaling

“Eeeeeehhhh !...pama amat apai tuai urang tu,”Mira enda nemu agi ka nyaut jaku Kaling

“Huhuhu !”enda berasai jaku nya pansut ari mulut Erik.Geli ati meda ulah Mira.Fatin enggau Selin  enda memunyi.Ngelakka Mira aja.Kadang-Kadang bisi ga seduai iya tuchum.

Sigi baka ulah urang indu enti  maia alah penemu.Macam-macam cara sida iya nunjukka enda puas ati.Kadang-kadang bisi sampai ngaludah.

“Amai nya Erik ?“Selin nanya

“Betul.Nama penguntung bula ke kita nya,”Ku Erik nyaut

“Ya anang bula kita.Lebu ngapa kami legi nganti,”ku Mira nandu baru

“Enda,”pandak aja jaku saut Shiney

“Sapa urang bukai bisi enggau kitai legi dah,?”tanya Selin ngalimpang ke jaku

“Sida Richard,Dianna,Arin enggau kaban iya,”ku Kaling nerangka bagi urang  ti bisi ka enggau sida sebuat malam legi.

“Ni nuan dah Erik,bisi enggau kin legi ?“pia tanya Selin

“Enda nemu.Lembau amai bejalai Kediri legi.Enda alah nyau ngema arang ke urang aja.Nama penyadi aku legi.Nusu tunjuk aja.Kita nyamai meh,bisi enggau ngangatka isi magang,”pia ku saut Erik meri jaku seriri.

“Ceh ! dinga di,nemu amat bejaku.Legi meh aku ngemai ke nuan,enti munyi nya.Anang tusah nuan.Bisi ibu tukang masak kitai dua iku dia dah.Talam seduai Timah.Pilih antara seduai iya.Ni ke ka nuan?”ku Selin bejaku ketawa sambil mampul jari iya ke mulut.Nyau lelekai ketawa iya.Sida ke bukai turut ketawa.

Geresi bulu pegu Erik ninga Selin nyebut nama Timah enggau Talam.Siku ti bernama Timah nya endang udah tuai.Lalu iya ke benama Talam nya agi biak.Benung dara.Abis tuai umur iya antara 20 taun ngagai 22 taun.Tang tudah Talam tu enda tentu nemu ngintu serta ngias diri.Kira ke old-fashioned.Jauh sekali ka nunda urang be make-up baka indu bukai.Nya alai jauh amai gamal iya tuai enti dibanding enggau umur iya ti bendar.Udah ga tubuh iya besai gemu.Nemulah… .diri ke nyadi cook,anang ga kelalu baka nya.Pandai-pandailah ngintu diri.Nya meda utai ta semua free nyau peneka ati makai.Enda betatak.Enda ngira jam.Ni enda baka kubal ti disepu dah.Nyau baka indu embom ka nebuk kayu ba dinding.Ari atas pala sampai ke baruh,sama size aja.Segala baka ikan buntal !   

“Aku enggai belegi-legi.Nyamai ta diatu netapka iya.Aku enggai urang bukai,alah enda urang ka tisi nuan nya meh.Nyamai beterus-terang diatu.Fatin nya meh enggau aku legi.Munyi ku jaku urang,Ka ke urang madah ke urang,enggai ke urang madah ke urang ”pia ku Erik bejaku enda bepanpul sambil iya tuchum merening Selin

Ninga utai munyi nya,Selin lalu melutka mata iya agai Fatin.Mira enda bejaku.Mua iya dikuingka iya ke bukai.Mulut iya majak kunyap-kunyap makai utai.Baka ke enda lantang ati iya dipeda.Engka iya enda berapa setuju meda Erik ka nguntek Fatin.

“Tanya meh urang empu tubuh.Nyamai  iya empu bisi,”ku Selin

“Nya ya bulih.Amat nya unggal.Bah… !kati baka  Fatin?”ku Kaling ngunjurka jaku Erik tadi

“Nadai salah.Janji ukai apai urang,”pia ku Fatin nyaut ari tisi.

Tegepang ati Erik.Berani amat indu tu bejaku pia ku ati Erik taja kurang pejaku.Nama dah,baka urang ka ngantuk disurungka pangal tudah Erik ninga jaku indu munyi nya.Bebunggai ati tudah Erik sepengudah ninga empas jaku urang indu munyi nya.Enda nyalah baka bulih beliung enda ulih ningkuh.Bulih kapak enda  ulih ngambuh.

“Amat nuan ?Enti munyi nya tabi dulu tua indu dara.Selamat bekelala ngagai nuan,”Erik bejalai ngalawa Fatin ti bediri nyendi Selin.Erik ngulurka jari mai Fatin betabi.

“Auuu….”ku Fatin.Jari Erik lalu disambut Fatin.Lembut amat jari Fatin diasaika Erik lebuh seduai iya betabi.

“Kami ka meh betabi enggau indu dara.Bah shake hands tua,”ku Shiney enggai alah lalu enda chechamang ngulurka jari diri.Fatin nadai ulih nyelihka diri.Ka enda,disambut meh jari urang ke ngulur.Enggaika dikumbai urang sumbong.

“Bah,betabi magang kitai.Ni nya alah seduai iya aja ditabi nuan.Seraya ke nyambut Hari Kemerdekaan tu,”pia ku Kaling.Kaling pin nyuaka jari iya ngagai Fatin

“Selamat Hari Kemerdekaan,”ku iya ngalulu ke diri.Udah nya Selin enggau Mira mega ditabi iya.

Meda baka nya,Erik enggau Shiney nunda ulah Kaling.Seduai iya sama-sama betabi enggau Selin enggau Mira lalu meri jaku ucap Selamat Hari Kemerdekaan.

Maya nya,mensia  enang udah maioh amai.Nyau besun-sun bala mensia sebelah jalai.Bisi nya benung bebelika barang.Bisi mega benung betawarka rega enggau urang ke bedagang.Ni nya ke benung makai.Ni ia ke benung ngirup ai bediri sambil bejalai.Bisi mega duduk tisi parit sambil berandau enggau panggan diri.Macham-macham ulah.

“Bah,ka meda utai dulu kami tiga tu au,”pia jaku Selin

“Nadai ku enggau ia meh,”balas Kaling.Udah nya iya lalu bejaku baru.“Malam legi kami nganti kita ba Dewan ping pong dia okay,”

“Auuuuu….,”ku Selin enggau Mira serentak nyaut.Fatin enda bejaku.Mina senyum aja.Erik pin meri senyum ngagai Fatin.Panjai senyum Erik.

Tembu jaku nya indu tiga iku nya lalu bebai ke pangan diri ngelayang ke jalai seberai.Ka meda utai kin.Peda nyau kimut-kimut burit sida tiga dibai bejalai.Asaika enggai badu ngemataka ke sida tiga nya bejalai.Badas amat ku ati Erik.

“Bah,sama mupuk ngiga utai ka dibeli kitai tiga tu unggal,”ku Kaling negur Erik.

“Barang ia meh unggal,”pia saut Erik sambil iya ngebuk handphone ari dalam kambut tanchut iya empu.Peda jam udah nunjukka pukul 10.30 pagi.Temu bebelika barang,sida tiga pin mupuk niki mulaika diri ke hostel.