Cerpen Iban

Jaku Pengalalu

Cerita dalam cerpen tu semina dikelulu serta ditempa aja.Semua karekator,pengawa,pendiau,nama mensia enggau menua nadai besangkut-paut enggau orang ti agi idup tauka udah mati.Selamat macha ngagai kita semua.

Nuan

 Part 1

Gambar pengias

Hari nyau ngalih.Matapanas udah rebah mucuk raras tang agi terit endar mancar ba pelilih menua Bintulu kelebih agi ba sitak Kemena Industrial Estate.Palan tu lebih kurang limabelas kilometer ngejang ari indu pasar besai Bintulu.Gaia mua hari mimit nadai meh ngayanka diri deka bebali petang.Agi chiru beresi belama datai ba tisi langit din.Puput ribut Timur Laut  ari tasik cina selatan nyau ayun lundai.Berasai kesut-kesut kesuh angin tamak nerusuk nengah selepak singkap cermain penjan hostel sida Erik sebilik.Bunyi kerita enggau perengka pengangkut ti nengah jalai alun besai ari Bintulu ke Tatau jauh amat kurang sari nya.Enda baka selama iya.Sebentar bisi didinga sangap munyi kapal narit tongkang kayu ba sungai Kemena.
Gaya hari ti manah sepemanjai hari nya meri pemujur bendar endur bala mensia mindah sari nya.Semua pengawa nadai terjanggal.Tambah mega hari nya kena hari besai ba kalenda menua Malaysia. Public holiday,31 haribulan Lapan.Hari kena ngelaie Independence Day.Kilang diketuka beroperasi kena siang hari nya laban meri awak endur pengawa general housekeeping enggau maintenance process dipejalaika.Bala staff ari Workshop Department baru gawa  sarinya.Orang ti gawa ba Production Line bisi mega nurun gawa ngemas department diri empu.Tang ukai semua.Semina urang dipaduka supervisor aja dibai gawa.Tusun pengawa Mechanical enggau Electrical Department hari nya endang berkaul ba meresi perengka injin enggau kuasa karan ti dikena gawa dalam kilang.Atur housekeeping sigi dipejalaika tiap minggu dikena nyeliahka penusah injin jai lebuh kilang beroperasi.Semua kerja nya mesti dikemas dalam timpuh setengah hari.Abis laun sebedau night shift berengkah gawa.

 Erik enda nurun gawa sarinya.Bakih sebilik iya Shiney,Kaling,Salam serta Richard sama enda gawa mega.Erik enggau Shiney  gawa ba Quality Control Department.Sekali dua bisi didinga bunyi ansar kaki urang bejalai serap-serap ba luar ketegal nurun sereta niki tangga tingkat atas hostel blok A.Sida Erik sekaban diau ba bilik nombor A15.Ringkat baruh sekali.Orang ba bilik sepiak sida Erik benung bepasangka radio.Radio Cats fm.
 

“Aram meh,enggau kami bakih ,“pia jaku Kaling sambil iya engkadahka pala diri ke atas ari puting pungang kaki katil tudah Erik.

Erik enda nyaut seleka mukut.Enda malas seleka beras.Baka ka enda ninga Kaling bejaku.Make don't know aja munyi ku jaku ribai.Tudah Erik agi bediri dedegi kenyau ari tadi ba sleeping bed iya empu.Sekejap jari iya digaruka iya ba sebelah pala ti enda gatal.Sebentar ngaru pala tisi pending kiba.Lalu sebentar mega  iya ngaru pala tisi pending kanan.Dikeriutka iya kulit kening.Ati iya enda keruan.Nya alai ulah Erik baka kera kena pukung enggau belacan.Erik enda nemu bakani ka mutuska penemu diri.Indah enda baka puyu mabuk keruh.Baka empelekung mabuk ambuh.Erik agi berpampang ati ka enggau bala bakih iya pansut ka pasar meda funfair.

Errr....gawa tauka enda aku tu?

Gawa.... ?
Enda.....?
Gawa...?
Enda....?
Pia ku Erik bentelah enggau ati diri empu.

Emmm…manah aja aku gawa.Bisi agi untung aku ngulihka overtime arika regap-regap sebelah pasar.Enti ka pasar,abis nadai dua tiga puluh ringgit lesap ari dompet dikena bebeli ka utai.Ka enda mata nyau tetengok meda barang dijual urang.Bedau dikira duit dikena nikam main ba funfair.

Manah aku kerja aja.Bisi duit.Ya….kerja aja aku.Full stop !.Erik bejaku Kediri.Berandau nengali.

 Dipeda Erik  semua bakih sama enggau iya sebilik udah tembu beradu nyikap diri.Sekira ka nganti maia deka bekejang aja.Enti nitih semaia  tengahari tadi,sida ka meda urang belagu ba funfair pasar malam Bintulu.Pengarami nya diatur serimbai enggau  nyambut Hari Kemerdekaan, bulan Lapan.Bisi penyanyi ari Semenanjung datai merindang  malam nya.Mr.Os pia ku jaku sekeda urang didinga Erik  lebuh makai tengahari tadi. Dining Hall  ricah laban mensia  bersebutka  Mr.Os bisi datai merindang malam nya.Lagu hit iya ,Joget Rumah Panjai  amat dikerinduka  ba menua Sarawak.Kelimpah nya,artis local pin bisi mega disadang datai merindang.

Erik kisok beradu laban deka masuk gawa lemai nya.Ba minggu tu Erik gawa night shift.Minggu nyin suba iya gawa day shift.Kompeni alai Erik gawa bisi dua shift.Shift A enggau shift B.Erik ba Shift B.Shift tu berganti seminggu sekali iyanya tiap-tiap kena hari lima.Hari lima mega nyadi day off ngagai semua kuli ba kompeni Manuply.Hari lima tu meh nyau nyadi Hari minggu bala pengareja pengawa di Manuply.Enti sema kuli diasuh gawa ia nyadi overtime.

”Ukai nya selalu kitai keluar ,“tampung Kaling baru.Iya agi bejaku baru meda Erik lalu enda memunyi malas jaku bai iya ka terubah tadi.

”Errr....enda aku,”balas Erik.Enda  besai bunyi  jaku kena iya nyaut sambil mata iya nengkiningka ngagai Kaling ti agi bediri tisi sukut katil.Sekalitu.Jari Kaling lalu dipegaika iya ba atas tisi sapat katil Erik.    

 Katil Kaling enggau Erik beringkat dua.Kaling tinduk ari baruh katil Erik.Dalam siti bilik bisi empat iti katil.Semua katil nya beranggung magang.Sepatut iya ba siti bilik diagihka 8 iku bala staff ulih diau.Tang semina lima iku aja bala sida kongsi ba bilik nya.Nya alai,agi bisi puang palan katil dalam bilik nya.Jarum jam maia nya nunjukka urung pukul 5:35 lemai.Erik bedau tentu lama udah abis mandi lebuh Kaling bejaku enggau iya.Erik sengaja nejuka bala roomate iya dulu mandi lemai nya.  

“Amat nya,anang irau nuan unggal.Legi aku ngasuh Mit mai Fatin,”pia ku Richard enda memukai nimbal ari tisi mua pintu enda jauh ari Kaling ti benung berdiri.Richard megai stokin lalu nudukka diri sepiak Shiney.Jari iya kiruh ngarasuk stokin ba kedua piak kaki iya lebuh iya mansutka leka jaku nya.

Mit pangan Richard.Nama endar Mit,Louisiana.Apai iya bansa Cina lalu indai iya bansa Iban.Kaul seduai iya dipeda rapat endar taja pin timpuh madu bungai pengarindu antara seduai iya agi baru.Dini  bisi Mit,bisi meh Richard.Kini-kini seduai iya tetap bisi begulai.Jarang dipeda berengang ari pangan diri.Semadi meh maia gawa aja seduai iya beserara.Baka belangkas ku urang.

Richard gawa nyadi Mechanical Technician.Richard minta pengawa ba Manuply sepengudah nembuka pelajar iya ba Politiknik Kuching.Nasib iya manah laban diterima  gawa ba Manuply.Tambah agi, iya bisi urang recommend .Bisi bala gawa dalam opis.Nama iya Laura.Laura tu indu bajik gamal.Tubuh iya ranjing serta burak baka upa.Benung manah dikayam sida ka lelaki.Buk enggi endu Laura panjai merundai tuntung punggung.Kuyu nyau pelu-pelu baka telu manuk.Mata enggi Laura manah udu dipeda baka puna mandi di jerua ai chiru.Mulut chukup manis baka lapis bungai ngerembai lemai.Tubuh iya ranjing serta burak baka upa.Ba dalam opis endur iya gawa,nadai siku indu ulih nanding gamal Lura.Maioh urang saru dikumbai indu cina Laura tu laban iras mua iya bisi ngambi mua cina.Bisi mega mua iya ngambi iras baka Charice Pempengo,artis antarabangsa berasal ari Philipine.Laura tu benung lekat engkiung munyi ku jaku tuai iban. Sweet  nineteen.Lelaki sigi nelan liur meda pemajik iya.Bisi cerita ngarimbas pending Erik madahka Laura tu nyadi adung lalai bos ba opis iya gawa.Kaling kala nusi utai nya ngagai Erik suba.Arap tusah.Enda arap tusah.Urang bukai bisi mega bersebutka gossip nya .Pandak mulut engkarasak.Panjai mulut kitai.Enti enda ketegal pangka ribut,enda punggu patah.

“Bah,kati baka? “Ku Richard nukuka tanya iya baru.

“Nama utai ?”

“Keluar kitai,”

“Bulan  bergantung senduk tu.Buah engkabang bedau ga labuh,”

“Sama magang kitai tu,“saut Richard enggau jampat
"Amat nya.Kami baka nya meh.Nadai berperening pangan tu unggal.Sebaka kitai"Sekali tu Shiney bejaku

“Bah,kati baka indu iya ka buk panjai pagi tadi dah ?”Ku Kaling nempelah mansutka jaku serdah iya.

“Amat nya.Agi single indu nya.Bedau bisi urang ngempu.Betul amat enti indu nya tangkup nuan unggal,“ku Richard bejaku baru
"Nyamai amat bejaku nih.Indah nangkap anak itik ga pedis.Anang nya,anak mensia nya wai....wai "timbal Erik
"Ukai pia,"balas Richard baru

“Bakani agi dah ?Kurus amat lumpet maya tu.Buah engkabang bedau ga labuh.Pandak singkang kaki.Ukai ka nyadi dah unggal,”ku Erik bekelikoh.

“Ahhh ! pekara mit nya unggal,”Richard nginsit ari tempat duduk lalu berdiri semak agi ngagai  Erik

“Aku bisi,anang irau nuan”sambung Richard baru sambil jari kanan iya narit kerepai ari kambut tanchut lalu ngerebakka ia ba mua Erik.Bisi empat lambar note limapuluh ringgit dalam dompet Richard.Bendar amat Richard ngumbuk Erik.

Richard majak nukik  Erik awakka terkuing ati ka enggau sida sebuat keluar malam nya.Richard sigi balat ka ngasuh Erik nguntek kaban Mit.Fatin nama indu nya.Mit enggau Fatin sama begulai gawa.Seduai iya kerja ba Kantin Kilang Manuply.Semina  tiga iku aja indu  Iban nyelat bansa urang bukai dia.Siku agi indu Iban benama  Selina.Selina tu bini Kaling.Jelan pemesai ga kantin endur sida gawa.Ulih disebut baka mini-market .Nyau ka lengkap barang bisi dijual.Pekakas rumah enggau keresa dapur bisi magang dijual. Bangsa Melayu Sambas enggau Jawa maioh gawa sama ba kantin  Manuply.

“Hemh !...ukai enggai aku,tang nadai enggau sida jaga shift malam.Enda chukup tubuh shift kami,”pia kenu saut Erik dikena iya berdalih ka jaku enggau kaban iya ka dua iku nya.

“Amat nya uchak.Enti nuan enggai nguji ka aku ga nguntek iya,”timbal Shiney.

Mata Shiney digaga iya pesap-pesap sambil ngalimchum merening mua Kaling enggau Richard ti agi bediri .Shiney duduk ba palan peninduk iya empu.Bed Shiney besenentang enggau bed Kaling.

“Anang jugau !...”ku Shiney nampung jaku iya baru.Jari Shiney lalu nyapai insap atas locker enda jauh ari atas pala iya ti bejaku.

Iya narit sebatang cigarette ari kotak insap ngena jari kanan lalu diengkahka iya ba mulut.Nyau cechuit batang insap lekat ba mulut Shiney.Insap nya dituchur iya enggau lighter.Sirutka iya asap insap dalam-dalam.Udah nya baru iya ngesuh  ka asap insap nya lubah-lubah.Peda nyau berlembuk asap pansut ari mulut Shiney.Baka asap kapal.   

”Nya neh !….Au enti nuan enda,awak ka Shiney ga,”ku Kaling

“Suka hati engkau oranglah.Sesiapapun boleh ,”balas Erik ngena jaku melayu

“Aku sigi ka.Indu nya ka enggai ka aku.Udah aku nguji nguntek iya,nadai respond lalu… uchak,”pia ku terang Shiney .Mua Shiney ditujuka iya lurus nunga Erik.

“Sapa urang indu ka, enti nuan rising-rising,”

“Enda aku rising-rising.Tanya nuan unggal Richard,”

Richard enda nimbal jaku Shiney.Iya semina ngangkatka bau iya tinggi tanda nadai comment pasal cerita Shiney nya. Jari Richard kiruh ngelepek kemas lipat baju panjai lengan ti dikena iya.
"Patut nya dalam timpuh dua tiga hari tu tudah kaban kitai tu rajin amat angkat pagi.Tumu belama enti nurun ngirup.Bisi undang di selepak batu.Ha ! ha ! ha ! "ku Kaling bejaku lalu disambut enggau ketawa.
"Ha ! ha ! ha !Au neh.Patut nya selalu nyerumba ungal Richard ngalamatu.Bisi utai ka diasu tudah kaban kitai tu.Enda tua nemu hal tu neh ungal ?pia ku Erik bejaku enggau Kaling  

“Sssssuuuttttt……furrrrrrr……!”bunyi sirut  insap Shiney.Udah nya Shiney ngesuhka baru  asap insap ari dalam mulut iya.Shiney enda ibuh ka jaku seriri Kaling enggau Erik.Iya semina senyum kediri.  

“Hahhh…..dah !sayau amat enda serambau.Enti aku agi bujang,enda jugau ayak kita tu.Nadai  ngelakka kita.Enda ampit kita nya,”ku Kaling mansutka jaku gidan.

“Nyengala nya kini ?“ku Erik sambil mata iya nyeling ngagai Richard.Jari Erik nyapai baju T churak biru.Bisi nombor 775 ba ari atas kambut baju.Nya nombor body pass Erik.Setiap iku pengereja pengawa ba kilang nya ngambuan nombor bebeda ari pangan diri. Baju nya lalu dipasuk ka iya ba tubuh.

“Apuuu….enda percaya ?”

“Ukai enda percaya…sigi percaya,”ku Erik

"Amat nya,rusa sigi enda kala nganjung diri ngagai pala tangga"ku Richard
"Betul.Aku setuju enggau jaku nuan nya unggal "ku Shiney
Erik enda memunyi.Lembau ka enggau sida tiga belaban jaku.Kapa enda sida iya ngumbai iya jugau.Ni ku sida iya meh bejaku dia.
Tang ka batang iya Erik ngasai ka berat ati ka sama-sama pansut laban iya nemu bala bakih iya deka nundi  serta nyabung iya couple enggau siku indu ti ditundi iya pagi tadi.Nama iya Fatin.

“Hemmm…”panjai bunyi seput dikesuhka Erik.Munyi demuh pama . Iya nguingka pala diri nunga kipas siling ti benung berpeling nyinuk muput dalam bilik.

”Ooii !..nama baju dikena nuan nya tekalih unggal ?”ku Shiney.Shiney udah tembu nginsap maia nya.Iya agi duduk ba palan peninduk iya empu lebuh ngamansutka jaku nya.

”Ni?”

“Uji perati ka nuan.Haaaa….!haaa…!Shiney lalu ketawa.Enda alah ditatka iya ati ti ka ketawa.

“Nyelai amat nya unggal,”padah Richard.Richard turut engkakah.

Apuu……!parai kitai.Bebadi enti aku nurun ngena gari baka tu.Malu amat dirara urang dalam kilang.Nasib bendar nuan ngerara unggal,”

“Peda nuan….,baju nya pin enda ngasuh nuan gawa unggal......unggal,”kenu ku Kaling

Shiney ngilik ka pala meda utai bakanya.

“Ah dah !.Au……meh.Kapa ka gawa enti bakatu.Engka amat enda ngasuh gawa nya unggal,”ku Erik.Erik lalu ngalisikka baju gawa nya ari tubuh iya.

"Nya.. .aaah ! "ku Erik sambil jari iya nikauka baju atas pangal

“ Bah nganti aku kita.Aku ka begari dulu,”pinta Erik ngagai bala bakih iya.Erik lalu muat ati.Enda nyadi nurun gawa lemai nya.                                                                                                       

“Hu ! hu !hu...No problem.Nya ia bulih,”saut Shiney.Richard senyum gaga meda Erik ka enggau sida.

‘Kerita sapa kena kitai ?”tanya Erik

“Van aku kena kitai unggal awakka ulih maioh tubuh,”ku Shiney offer diri empu

“Aku ngena kerita aku empu.Enti agi dua iku agi ulih enggau aku.Nuan nepan ba kerita aku unggal.Legi aku ngasuh Mit mai Fatin sama nepan ba kerita aku,”pia ku Richard

“Anang ngachau daun nuan unggal.Utai agi baru,nemu-nemulah nuan,“ku Kaling nundi

“Amat wai.Utai benung beapi-api nya,”ku Erik nampung jaku tundi Kaling.Mulut iya bejaku tang mata iya gegining ngiga barang dalam locker.Tarit iya tanchut jean bechura biru lalu diengkahka iya ba atas pangal.Udah nya Erik narit baju T bechura burak apus.Diengkahka iya ba atas pangal mega.

“Aku pansut dulu ngabas Joseph enggau Arin,sama ada seduai iya nyadi enggau kitai tauka enda,” Ku Shiney

“Okay,”ku Erik

“Enti pia,Kin dulu aku unggal,legi aku kitu baru au.Aduka dulu ngepan nuan,”ku Shiney bejaku baru sambil merening mua Erik.

Tembu bejaku,Shiney lalu angkat ari katil iya.Shiney lalu nyapai anak kunci enggau serangan insap.Udah nya iya lalu berdiri serta nukangka pintu bilik.Shiney lalu pansut.
Tup.... ! Bunyi pintu ditambit iya ari luar.
Bisi kekerus bunyi ansar kasut Shiney bejalai ari luar didinga Erik ari dalam bilik.Lama agi,jauh agi ga bunyi kerus kasut Shiney.Udah nya nadai didinga agi.

“Aku ka meh pansut .Aku ka ngalawa bini aku dulu.Nganjung gari aku dulu.Gari kena aku gawa kemari  lalu bedau dianjung kin,”Ku Kaling

Kaling mansang ari tisi mua pintu lalu ngalawa locker iya empu.Kaling lalu nuduk ka diri.Jari iya narit kunci ari kambut tanchut lalu muka kunci locker.Kaling lalu nepu gari iya dalam beg plastik chelum.Udah abis nyimpan gari dalam beg plastik iya lalu ngunci locker.

“Bah,kin dulu aku unggal,”ku Kaling madahka diri

“Barang ia meh,”ku saut Richard

Kaling lalu mupuk.Tinggal Erik enggau Richard aja dalam bilik.

kringggggg…… !kringgggg…….!kringggg……..! talipaun binching Richard bebunyi

“Hello,dini nuan?”pia Ku Richard bejaku.Dipelabaka Erik engka Richard bejaku enggau Mit.

“Okay,nganti aku ba luar aja.Aku kia diatu.Bye,”pandak aja randau Richard ba talipaun

“Mit?”

“Au.Pansut dulu aku unggal,”

“Alright,”Saut Erik pandak aja.Erik baru tembu masukka baju enggau tanchut panjai.Erik nyapai minyak buk ba atas locker.Dibuka ia tudung,lalu dichulikka iya.Minyak jenama Tancho nya lalu diengkahka iya ba tapak jari lalu digusuk.Udah nya Erik ngunsut minyak nya ba buk iya.

Richard lalu ninggalka bilik.
Tup ! bunyi pintu bilik ditikup Richard ari luar
Tinggal Erik siku dalam bilik.Erik ngamataka Richard pansut ke luar aja.Erik lalu nyingkau sugu.Iya lalu nyugu buk diri.

”Beres.Semina nganti Shiney aja agi,”ku iya bejaku Kediri.Berandau nengali.

Erik lalu ngalika diri ba peninduk iya.

“Meda tv dulu,”ku Erik

Dijingkau iya remote control tv tisi iya ka gali.Tv LCD empatpuluh inci nya baru dua bulan udah dibeli iya ba pasar Bintulu berega dua ribu enam ratus ringgit.Erik lalu masang tv.Ditekanka iya nombor tiga ba remote control lalu keluar siaran NTV7 ba skrin tv.Cerita kartun.Mata Erik nadai minat meda cerita nya.Tv dilakka iya idup aja.Mata Erik tajam merening atas siling ba endur iya gali.Runding Erik teringatka indu benama Fatin.

 Jauh kerawang runding Erik lebuh iya gali kediri.Enda disadang pengingat iya terebai ingap ba pengawa iya pagi tadi.Iya teringatka  indu ti bernama Fatin.Indu ti enda tentu pejaku .Fatin pekerja baru ba Manuply .Erik baru berentak amai meda Fatin sari nya. Erik tuchum kediri ingatka ulah  iya empu lebuh ngameranika ati diri meri jaku tundi ngagai Fatin pagi tadi.Jaku manchal ti enda disadang ulih pansut ari mulut Erik.Enti bisi urang meda iya senyum kediri baka nya tentu sida ngumbai iya enda apus tuat.Geli ati kediri.

“Fuhh !Fatin…….Fatin…..,”enda berasai nama indu nya pansut ari mulut Erik.    

Bersambung.........